डि पि ओ प्रतिनिधिहरुका लागि “समावेशी कोविड-१९ प्रतिकार्य व्यवस्थापन” तालिम!

विश्वमा फैलिरहेको कोविड-१९ महामारीलाई मध्यनजर गर्दै राष्ट्रिय अपाङ्ग महसंघ नेपालको आयोजनामा पाँच दिने “समावेशी कोविड-१९ प्रतिकार्य व्यवस्थापन” तालिम असोज २६ गते सफलता पुर्वक सम्पन्न भयो । राष्ट्रिय अपाङ्ग महासंघ नेपाल, सीएमसी नेपाल (मानसिक र मनोसामाजिक स्वास्थ्य) र सप्रोस नेपाल (समावेशी आधारभूत आवश्यकता सहयोग) को सी बी एम सँग संयुक्त तत्वावधानमा कार्यान्वयन भईरहेको “कोविड-१९ प्रतिकार्यमा अपाङ्गता समावेशीकरण” सम्बन्धि छ-महिना अवधिको परियोजना अन्तर्गत तालिम आयोजना गरिएको हो ।

समावेशी कोभिड १९ व्यवस्थापनका लगि स्थानीय अभियान्ताहरुको क्षमता विकास गर्न र उनीहरूको जनवकालतका कामहरूलाइ प्रभावकारी बनाउन यस तालिम आयोजना गरिएको हो । विभिन्न प्रकारका अपाङ्गता भएका व्यक्तिहरुलाई एकै स्थलबाट प्राविधिक माध्यम “जूम” प्रयोग गरी तालिम सन्चालन भएको हो । यस तालिममा सिन्धुपाल्चोकको ईन्द्रावती र हेलम्बु नगरपालिका, र काभ्रेको मन्डनदेउपुर र भुम्लु नगरपालिकाको अपाङ्गता भएका व्यक्तिहरुको संघ संस्थाको प्रतिनिधिहरुको सहभागीता रहेको थियो । १८ (९ महिला, ९ पुरुष) जनाले सहभागीता जनाएका थिए ।

यस तालिममा राष्ट्रिय अपाङ्ग महसंघ नेपालका नि:वर्तमान अध्यक्ष र अधिवक्ता, सुदर्शन सुवेदी प्रशिक्षकको रुपमा रही र सीएमसी नेपाल बाट प्रतीमा खतीवडा (कार्यक्रम संयोजक र मनोविमर्शकर्ता) र ज्योती लामा (मनोविमर्शकर्ता) सह सहजकर्ताहरुले  तालिम सहज ढंगमा सन्चालन गर्नु भएको थियो । तालिममा विपद्, जोखिम जस्ता केही शब्दावलीका सामान्य परिभाषा सँगै, मानसिक स्वास्थ्य र मनोपरामर्शको सामान्य जानकारी र सम्भव उपायहरु, कोभिड १९ को जानकारी र संक्रमणबाट अपांगता भएका व्यक्तिहरू कसरी प्रभावित हुन्छन् र कसरी सुरक्षित बनाउने, विपद् व्यवस्थापनमा स्थानीय तहको भूमिका, अपांगता समावेशी विपद् व्यवस्थापनसम्बन्धी नीति गत र कानुनी व्यवस्थाहरू, अपाङ्गता समावेशी प्रतिकार्यमा सहभागी प्रतिनिधिहरुले गर्न सक्ने कृयाकलाप, विपदको समयमा हुने लैङ्गिक हिंसा र जोखिम अनि त्यसका उपायहरु, समावेशी कोभिड-१९ प्रतिकार्यको लागी वकालत र सचेनता जस्ता समसामयिक विषय वस्तुलाई सरल र सहज तरिकाले समेट्दा सहभागीहरुले पनि कौतुहुलता जनएका थिए ।  

काभ्रे का आयुसा थापाले भनिन, “विभिन्न अपाङ्गता भएका व्यक्तिहरुलाई एकै ठाउँमा राखी सान्दर्भिक विषयमा छलफल गराई हामीलाई सहभागी गराउनु भएकोमा यस्त्तो उपलब्धी मुलक तालिमका लागि धन्यवाद ज्ञापन गर्न चाहन्छौं । स्थानीय तहमा अपाङ्गता भएका व्यक्तिकै लागि भनेर यस्ता तालिम आएमा अझै अगाडि बढ्न सजिलो हुने थियो भन्ने प्रतिकृया दिएकी थिईन ।

तालिमका सहभागिहरुले आगामी दिनमा राष्ट्रिय अपाङ्ग महासंघको सम्पर्कमा रहि सुदर्शन सुवेदी ज्युको मार्ग निर्देशन अनुरुप वकालत कसरी गर्ने र यसको कार्य योजना निर्माणमा संलग्न रहने प्रतिबद्धता सहित तालिम समापन भएको छ ।